ဖိုးလပြည့်

လက်ဝှေ့ကို ဘယ်လို စတင်ခဲ့လဲ

မိဘနှစ်ပါးစလုံးသည် လက်ဝှေ့နှင့် လုံးဝမပတ်သက်ခဲ့ကြပါ။ ငယ်စဉ်က ခြင်းလုံးနှင့် ဘောလုံးကစားခဲ့ပြီး၊ ဂျက်ကီချန်းနှင့် ဂျက်လီတို့၏ အက်ရှင်ရုပ်ရှင်များကို ကြည့်ရင်း ကိုယ်ခံပညာကို စိတ်ဝင်စားလာခဲ့သည်။ အတန်းပညာသင်ကြားနေစဉ် လက်ဝှေ့လောကမှ လူများနှင့် ရင်းနှီးလာကာ အသက် ၁၆ နှစ်အရွယ်တွင် လေ့ကျင့်မှုကို စတင်ခဲ့သည်။

အစပိုင်းတွင် မိဘများက ကန့်ကွက်ခဲ့ကြသည်။ သို့သော် ရန်ကုန်နှင့် နယ်ပယ်အသီးသီးတွင် မိမိအမည်ဖြင့် ပွဲထိုးလာနိုင်သည့်အချိန်မှစ၍ လက်ခံအားပေးလာခဲ့ကြသည်။ မိခင်ဖြစ်သူကတော့ သား၏ပွဲကို လက်ဖဝါးကြားမှပင် ခိုးကြည့်ခဲ့ရတယ်ဟု ပြောပြပါသည်။

လက်ဝှေ့ကို ဘယ်လို သင်ယူခဲ့လဲ

ထိုခေတ်က စနစ်တကျ စာရင်းသွင်းတက်ရောက်နိုင်သည့် ကလပ်နှင့် သင်တန်းများ မရှိသေးပါ။ ဖိုက်တာများရှိရာသို့ ကိုယ်တိုင်သွားရောက်ကြည့်ရှုကာ ဆရာကြီးများနှင့် ဝါရင့်ကစားသမားများအတွက် လိုအပ်တဲ့ ဝေယာဝစ္စ လုပ်ကိုင်ပေးရင်း နည်းစနစ်တစ်ခုချင်းစီ သင်ယူခဲ့ရသည်။ လေ့ကျင့်ရေးဝတ်စုံမရှိသဖြင့် ပုဆိုးကို ကတောင်းကျိုက်ကာ လေ့ကျင့်ခဲ့ရသည်။

လက်ဦးဆရာများမှာ ဆရာဦးမောင်ကျော်၊ ဆရာဦးတင်ဦးနှင့် ဆရာစောငမန်းတို့ ဖြစ်သည်။ လက်ဝှေ့လမ်းကြောင်းတစ်လျှောက် ဆရာဝင်းထွန်းအပါအဝင် အတူလေ့ကျင့်ခဲ့သော စီနီယာကစားသမားများထံမှလည်း သင်ယူခဲ့ရသည်။

လက်ဝှေ့သမားဘဝတစ်လျှောက်လုံး EverGreen ကလပ်တစ်ခုတည်းတွင်သာ လေ့ကျင့်ခဲ့သည်။ ထိုကလပ်ကို နောက်ပိုင်းတွင် ရွှေဖူးကလပ် ဟု အမည်ပြောင်းလဲခဲ့ပြီး၊ ထိုးသတ်ခဲ့သမျှ ပွဲတိုင်းတွင်လည်း ထိုကလပ်ကိုယ်စားပြုခဲ့သည်။

လက်ဆင့်ကမ်းလာသော ပညာ

အလွတ်တန်း မြန်မာပြည် ရွှေခါးပတ် ချန်ပီယံဟောင်း ဆရာစောငမန်းထံတွင်လည်း လေ့ကျင့်ခဲ့သည်။ ထိုခါးပတ်သည် မြန်မာ့လက်ဝှေ့၏ အမြင့်ဆုံးဂုဏ်ပုဒ်ဖြစ်သည်။ ဆရာစောငမန်းထံမှ ရရှိခဲ့သော နည်းစနစ်များကို ယနေ့ PLP Fight Club တွင် တပည့်များထံ ပြန်လည်လက်ဆင့်ကမ်းပေးနေသည်။

ရန်ကုန်ဇာတိဖြစ်သော်လည်း ပွဲထိုးသည့်နှစ်များတွင် တစ်နေရာတည်း၌ အခြေမချခဲ့ပါ။ ရန်ကုန်နှင့် ဆရာစောငမန်းရှိရာ ကရင်ပြည်နယ်၊ ဘားအံမြို့တို့တွင် အလှည့်ကျနေထိုင်ကာ လေ့ကျင့်ခဲ့သည်။

ကြိုးဝိုင်းအမည်၏ အကြောင်း

“ဖိုးလပြည့်” သည် မွေးရာပါအမည် မဟုတ်ပါ။ လက်ဦးဆရာ ဆရာမောင်ကျော်ပေးအပ်ခဲ့သည့် လက်ဝှေ့အမည်ဖြစ်သည်။

ပေးဆပ်ခဲ့ရသည့် အရာများ

မျက်စိဒဏ်ရာကြောင့် ခွဲစိတ်ကုသမှုခံယူကာ ခြောက်လနားခဲ့ရသည်။ လက်ရိုးကျိုးသည့်အခါလည်း နောက်ထပ်ခြောက်လ နားခဲ့ရသည်။ ဒုတိယအကြိမ် အနားယူရသည့်ကာလတွင် အခြားအလုပ်တစ်ခုကို မလုပ်ချင်ခဲ့ဘဲ၊ ပြန်လည်သက်သာလာသည်နှင့် ကြိုးဝိုင်းထဲသို့ ချက်ချင်းပြန်ဝင်ခဲ့သည်။

ကြိုးဝိုင်းမှ ခေတ္တအနားယူပြီး ပြန်လာခြင်း

အိမ်ထောင်ကျပြီးနောက် နောက်ထပ် လေးငါးပွဲခန့် ဆက်ထိုးခဲ့သည်။ မိသားစုတာဝန်များကို ဦးစားပေးရသလို COVID-19 ကာလတွင်လည်း ပွဲများ လုံးဝရပ်ဆိုင်းသွားခဲ့သောကြောင့် အနားယူဖြစ်ခဲ့သည်။ ယခုအခါ နည်းပြတစ်ဦးအဖြစ် ပြန်လည်ပါဝင်နေသည်။